D’n Opstaekerᵀᵐ 2020 ein ontwerp van Ruud Simons
Beeldend kunstenaer Ruud Simons oet Bliërick haet veur de kômende vastelaovend D’n Opstaekerᵀᵐ 2020 ontworpe. Vors Carotius VIII van Vastelaovesgezelschap De Wortelepin vroog Simons um dit jaor oet naam van alle vief de stadsdeilvereinigingen D’n Opstaekerᵀᵐ 2020 te ontwerpe. Ut ontwerp van Simons is ein ode aan de kater.
“Mit Vastelaovend toovere weej altied weer de meist fantasievolle creaties ôgner ôs muts oet. De wildste ideeën ontstaon, de creativiteit knalt oet ozze kop en vindt zien vorm in uiteinlaupende pekskes, geschminkte gezichte, heud en optochwaegens. De tied van joeks en theater is aangebraoke waobeej ut vloeibaar gold auk riekelik door de straote streumt’, aldus Simons. ‘Maar zoäs alles in ut laeve haet auk de vastelaovend soms zien kierzijde. Met al dat gefiés kan ut zien dat men ‘s angerdaags opsteit met unne bonkende koppienn onger die muts. D’n alcohol toent den zien valse karakter. Beej menig vastelaovesvierder is den ein paracetamol, eine flinke sloet koffie en ein geruusterd botterhamke nuudig um zich ’s middags waer vol euvertuuging euver te kinne gaeve aan de muuziek en ’t gedans. En opeins huurs ze dan waer: ‘Schöd d’r mich nog eine in, ik vind det grej zoë lekker…”.
D’n Opstaekerᵀᵐ is ein soort broche det steit veur ein dreejtal zaake; ein blik van waardering veur de vuule vreejwilligers die allerlei vastelaovendaktiviteiten organiseren in de stadsdeile van Venlo, Blerick, Bookend, Holt-Blierick, Tegelen, Belfeld, Arcen en Velden; ein blik van betrokkeheid met de vastelaovend en ein financiële opstaeker veur alle vastelaovensvereinigingen oet dees regio. De vief stadsdeelvereinigingen van de gemeinte Venlo haope det de inwoeners, net as veurig jaor, weer massaal dees vastelaovesbroche zulle kaupe um zoë de verschillende vastelaovesaktiviteiten van de diverse vereinigingen te ondersteune.
Ruud Simons (57) haet in Mestreech de Stadsacademie veur Toegepaste Kunst (ABKM) bezoch en de ierste graad docentenopleiding TEHATEX waor hae in 1986 is aafgestudeerd. Hae creëert twie- en dreejdimensionaal werk oet allerlei materiaal. Simons is in zien werk veural op zeuk nao de mentale ruumte, de ruumte die ontsteit tôsse de vorm en de beteikenis van zin kreatie. In dees mentale ruumte ontsteit de evocatieve krach, ein subjectieve krach die beej utt publiek vraoge en interpretaties opwek. Simons is onger angere bekind van “Circle of Influence” op ut Gelreplein in Venlo en ut bronzen beeldje “De Vastelaoves Geis”, de optochttrofee veur de winnaar van d’n Blierickse optocht. Mier informatie euver Ruud Simons is te vinde op www.ruudsimons.com
D’n Opstaekerᵀᵐ 2020 zal op den Elf-de van Elf -de waere gepresenteerd.
Vanaaf deej datum is hae ook te koop beej ôs vereinging.
Geej kint deze kaupe beej Peter Titulaer, Kockerseweag 71, of vraog tiedus de vastelaovend aktiviteiten nao d’n opstaeker beej ein van de bestuursleeje.
Pries € 5,-.